मोठी स्वप्ने नुसती बघू नका तर ती पूर्ण करण्याचा प्रयत्न करा
--- आर्किटेकट मा. सौ. कोमल थोरात
मलकापूर --
श्री मळाईदेवी शिक्षण संस्थेच्या कन्याशाळा मलकापूर येथे इयत्ता दहावीतील विद्यार्थिनींचा शुभचिंतन व निरोप समारंभ १२फेब्रुवारी २०२६ रोजी आयोजित करण्यात आला होता यावेळी बोलताना त्यांनी हे मत व्यक्त केले..
यावेळी बोलताना प्रमुख पाहुण्या व कन्याशाळा मलकापूरच्या माजी विद्यार्थिनी मा.सौ. कोमल थोरात यांनी दहावीनंतर करिअर कसे करावे याविषयी मार्गदर्शन केले. प्रयत्नामध्ये सातत्य ठेवा. तंत्रज्ञानाचा वापर करत ध्यानधारणा करा असा सल्ला त्यांनी दिला.मोठी स्वप्ने नुसती बघू नका तर ती पूर्ण करण्याचा प्रयत्न करा असे आवाहन त्यांनी यावेळी केले.
कार्यक्रमाची सुरुवात मान्यवरांच्या शुभहस्ते दीपप्रज्वलाने व सरस्वती पूजनाने करण्यात आले. यावेळी कार्यक्रमाच्या प्रमुख पाहुणे संस्थेचे माजी विद्यार्थी मा. कर्नल कुलदीप करपे,प्रमुख पाहुण्या पी. एस. आय मा. सौ. रेखा देशपांडे मॅडम, कार्यक्रमाचे अध्यक्ष नगरसेवक मलकापूर नगरपरिषद मा.भिमाशंकर माऊर,संस्थेचे सचिव शेतीमित्र मा. अशोकराव थोरात भाऊ, संस्थेचे उपाध्यक्ष मा.भास्करराव पाटील,खजिनदार मा. तुळशीराम शिर्के,संचालक वसंतराव चव्हाण, माजी प्राचार्य मा. सुरेश राजे, पथक पर्यवेक्षण प्रमुख मा.शरदराव चव्हाण सर, मा.आर.ए.कुंभार सर, मा. यादव सर, शाळेच्या मुख्याध्यापिका सौ. सुलोचना भिसे यांची उपस्थिती होती.
यावेळी कार्यक्रमाचे प्रास्ताविक सौ. सुलोचना भिसे यांनी केले. आपल्या प्रास्ताविक भाषणात त्यांनी विद्यार्थिनींना परीक्षेसाठी शुभेच्छा देताना चांगल्या प्रकारचे यश तुम्ही सर्व जणी नक्की मिळवणारच अशी सदिच्छा व्यक्त केली. सर्वांनी धाडसाने परीक्षेला सामोरे जावून यश मिळवावे असे मुलींना आवाहन केले.
यानंतर इयत्ता दहावीतील सर्व परीक्षार्थी विद्यार्थिनींना सर्व विद्यार्थिनीच्या वतीने इयत्ता नववीतील कु.सिद्धी पेटले, कु. समृद्धी जगदाळे आणि कु.असिया मत्तेखान यानी शुभेच्छा दिल्या व दहावीतील विद्यार्थिनीच्या सोबत शाळेत व्यतीत केलेला क्षणांना उजाळा देत तुमचे यश आम्हा सर्वाना प्रेरणादायी ठरेल असे मात यावेळी व्यक्त केले.
दहावीतील कु.स्वरा पाटील, कु. अर्पिता सूर्यवंशी, कु.धनश्री संपकाळ, कु. रोहिणी कुंभार, कु.संजना जाधव, कु.भक्ती बळप, कु.आलिशा मुल्ला, कु. वेदिका मस्कर, कु. श्रावणी शिंदे,कु. मधुरा पाटील, कु.अक्षरा साळुंखे यांनी मनोगत व्यक्त करताना शाळेने आम्हाला फक्त शिक्षणाचे धडे दिले नाहीत तर जगण्याची नवी दिशा दिली. ही शाळा फक्त इमारत नाहीतर आमच्या यशाची पायरी आहे. शाळेने आम्हाला समाजात कसे वागायचे हे शिकवले,शाळा फक्त आमच्यासाठी इमारत नाही तर ते दुसरे घर होते असे शाळा माऊली सदैव स्मरणात राहिलअशी भावना सर्वांनी व्यक्त केली.
इयत्ता दहावीच्या वर्गशिक्षका सौ. वनिता येडगे यांनी विद्यार्थिनींना इयत्ता दहावीच्या परीक्षेसाठी शुभेच्छा देत विद्यार्थिनींच्या विषयी आपले मनोगत व्यक्त केले.त्यामध्ये त्यांनी विद्यार्थिनींनी स्वतःच्या क्षमता ओळखून भविष्यात वाटचाल करावी व यशाची शिखरे सर करावीत असे मत व्यक्त केले.
कार्यक्रमाच्या प्रमुख पाहुण्या पीएसआय सौ. रेखा देशपांडे यांनी आपले मनोगत व्यक्त करताना विद्यार्थिनींना शुभेच्छा देत खूप चांगलं माणूस बना असा सल्ला दिला.
कर्नल कुलदीप करपे यांनी मनोगत व्यक्त करताना श्री मळाईदेवी शिक्षण संस्थेचा माजी विद्यार्थी असल्याचा सार्थ अभिमान आहे.आपल्या शालेय जीवनातील गोड आठवणींना उजाळा देत त्यांनी विद्यार्थिनींना प्रोत्साहित करीत एन.डी.ए विषयी मार्गदर्शन केले. जास्तीत जास्त मुलींनी एन.डी.ए मध्ये सहभागी व्हावे. उद्याची सोफिया कुरेशी व व्योमिका सिंग मी तुमच्यात पाहतोय असे भावनिक आवाहन करीत मुलींनी परीक्षेला जाताना कोणती काळजी घ्यावी याविषयी मार्गदर्शन केले.
कार्यक्रमाचे प्रमुख पाहुणे माजी प्राचार्य श्री. सुरेश राजे यांनी आपले मनोगत व्यक्त करताना मुलींनी परीक्षेला आत्मविश्वासाने सामोरे जावे. शाळेने विद्यार्थिनीच्यावर भक्कम संस्कार केले असून ज्ञानाची शिदोरीही दिलेली आहे असे सांगत सर्व विद्यार्थिनींना भावी आयुष्यासाठी शुभेच्छा दिल्या.
यावेळी पथक पर्यवेक्षण प्रमुख श्री.शरदराव चव्हाण सर यांनी आपले मनोगत व्यक्त करताना जिद्द चिकाटी व आत्मविश्वास असेल तर यश नक्की संपादन करू शकतो. ध्येय निश्चित करा आणि संघर्षाने परीक्षेला सामोरे जा असे आवाहन त्यांनी केले.
कार्यक्रमाचे अध्यक्ष भिमाशंकर माऊर यांनी इयत्ता दहावीतील विद्यार्थिनींना परीक्षेसाठी शुभेच्छा देत विद्यार्थिनीनी परीक्षेला धैर्याने सामोरे जावे व कन्याशाळा मलकापूरची यशाची परंपरा अखंड ठेवावी. आपले व आपल्या विद्यालयाचे नाव उज्वल करावे असे मत यावेळी त्यांनी व्यक्त केले. यावेळी त्यांनी सर्व विद्यार्थिनींना शालोपयोगी साहित्य पेन या साहित्याचे वाटप करण्याचे जाहीर केले व याच्या बळावर विद्यार्थिनींनी आपले भविष्य उज्ज्वल करावे असे भावनिक आवाहन केले.
कार्यक्रमाचे सूत्रसंचालन सांस्कृतिक विभाग प्रमुख सौ.कविता थोरात यांनी केले तर आभार पर्यवेक्षिका मा.सौ.करुणा शिर्के यांनी मानले. यावेळी माता -पालक व शिक्षक -पालक सदस्य मोठया संख्येने उपस्थित होते.
