श्री मळाईदेवी शिक्षण संस्था, कन्याशाळा मलकापूर येथे ब्रह्मीभूत गंगाधर चैतन्य महाराज पुण्यतिथी व गुणवंत खेळाडूंचा सत्कार सोहळा संपन्न
मलकापूर (प्रतिनिधी):
श्री मळाईदेवी शिक्षण संस्थेचे कन्याशाळा मलकापूर येथे ८ ऑक्टोबर २०२६ रोजी ब्रह्मीभूत गंगाधर चैतन्य महाराज पुण्यतिथी अत्यंत उत्साहात आणि भावपूर्ण वातावरणात साजरी करण्यात आली.कार्यक्रमाच्या प्रारंभी श्री मळाईदेवी व ब्रह्मीभूत गंगाधर चैतन्य महाराज यांच्या प्रतिमेचे पूजन श्री. अमृत शिर्के आणि शाळेच्या पर्यवेक्षिका सौ. करुणा शिर्के यांच्या शुभहस्ते भावपूर्ण वातावरणात संपन्न झाले. याप्रसंगी कन्याशाळेच्या मुख्याध्यापिका सौ. सुलोचना भिसे, सर्व शिक्षक-शिक्षिका आणि शिक्षकेतर कर्मचारी यांची प्रमुख उपस्थिती होती. तसेच संस्थेचे अध्यक्ष मा. भास्करराव पाटील संस्थेचे खजिनदार श्री. तुळशीराम शिर्के आणि संचालक श्री. पवन पाटील सर यांनी या निमित्ताने विद्यालयाला विशेष भेट देऊन कार्यक्रमास शुभेच्छा दिल्या.
उपस्थित विद्यार्थिनींना मार्गदर्शन करताना पर्यवेक्षिका सौ. करुणा शिर्के यांनी ब्रह्मीभूत गंगाधर चैतन्य महाराज यांच्या जीवनपटावर प्रकाश टाकला. त्यांच्या महान कार्याची आणि शैक्षणिक-सामाजिक योगदानाची सविस्तर माहिती त्यांनी विद्यार्थिनींना दिली.तसेच, गुणवंत खेळाडूंचे कौतुक करताना त्यांनी विद्यार्थिनींना अभ्यासासोबतच खेळ आणि इतर उपक्रमांतही जिद्दीने पुढे जाण्याचा संदेश दिला. या प्रेरणादायी विचारधारेमुळे विद्यार्थिनींमध्ये एक नवीन ऊर्जा आणि उत्साह निर्माण झाला.
कार्यक्रमाप्रसंगी उपस्थितांना मार्गदर्शन करताना कन्याशाळा मलकापूरच्या मुख्याध्यापिका सौ.सुलोचना भिसे यांनी आजच्या पावन प्रसंगाचे आणि पुण्यतिथीच्या दिवसाचे विशेष महत्त्व विद्यार्थिनींना अत्यंत सोप्या व मार्मिक शब्दांत पटवून दिले.त्या म्हणाल्या, "ब्रह्मीभूत गंगाधर चैतन्य महाराज यांचे विचार आणि संस्कार हा आपल्या शिक्षण संस्थेचा खरा पाया आहेत. त्यांनी शिक्षण व समाजासाठी दिलेले योगदान आजही आपणा सर्वांना प्रेरणा देणारे आहे. अशा महान पुरुषांच्या पावन स्मृती जपणे आणि त्यांनी दाखवलेल्या सन्मार्गावर चालणे, हीच त्यांना खरी आदरांजली ठरेल."असे आवाहन केले.
पुण्यतिथीचे औचित्य साधून कन्याशाळा मलकापूरमधील क्रीडा क्षेत्रातील गुणवंत विद्यार्थिनींचा गौरव करण्यात आला. ॲथलेटिक्स, व्हॉलीबॉल, टेबल टेनिस, बुद्धिबळ, कुस्ती आणि क्रिकेट या विविध क्रीडा प्रकारांत जिल्हास्तर व विभागस्तरावर निवड झालेल्या यशस्वी खेळाडूंचा सत्कार करण्यात आला. यासोबतच जिल्हा परिषद केंद्र शाळा, मलकापूर येथील बालक्रीडा स्पर्धेत उज्ज्वल यश संपादन केलेल्या बालखेळाडूंचाही विशेष सत्कार करून त्यांना प्रोत्साहन देण्यात आले.
आजच्या या विशेष प्रसंगी शालेय पोषण आहाराच्या वेळी विद्यालयातील सर्व विद्यार्थिनींना चवदार शिऱ्याचे वाटप करण्यात आले. या स्वादिष्ट अल्पोपहाराचा आस्वाद घेत विद्यार्थिनींनी हा दिवस अत्यंत आनंदात आणि स्मरणीय असा साजरा केला.
कार्यक्रमाच्या शेवटी विद्यालयाच्या मुख्याध्यापिका, पर्यवेक्षिका, शिक्षक-शिक्षिका, शिक्षकेतर कर्मचारी व सर्व विद्यार्थिनींच्या वतीने ब्रह्मीभूत गंगाधर चैतन्य महाराज यांच्या पावन स्मृतीस विनम्र आदरांजली अर्पण करण्यात आली.
